Ўзбекистон ташқи ишлар вазирига янги ўринбосар тайинланди
Мирвоҳид Азимов бунгача Туркий давлатлар ташкилоти бош котибининг ўринбосари лавозимида фаолият юритган.
Шавкат Мирзиёевнинг 26 майдаги қарори билан Мирвоҳид Мирилясович Азимов Ўзбекистон ташқи ишлар вазирининг ўринбосари лавозимига тайинланди.
Ўзбекистон Ташқи ишлар вазирлиги матбуот хизмати маълум қилишича, Мирвоҳид Азимов 26 май куни вазирлик жамоасига таништирилган.
46 ёшли дипломат 2020 йил кузидан буён Туркий давлатлар ташкилоти бош котиби ўринбосари лавозимида ишлаб келаётган эди.
Мирвоҳид Азимов Жаҳон иқтисодиёти ва дипломатия университетининг халқаро ҳуқуқ йўналиши бўйича бакалавриат ва магистратура босқичларини тамомлаган. У юридик фанлар номзоди ҳисобланади.
Шунингдек, у Ташқи ишлар вазирлиги тизимида 20 йилдан ортиқ тажрибага эга бўлиб, 4 йил давомида Пекин шаҳридаги Шанхай ҳамкорлик ташкилоти котибиятида ишлаган. Турли йилларда Ташқи ишлар вазирлигининг Шартнома-ҳуқуқий бошқармасига ҳам раҳбарлик қилган.
