Андижондаги “Ғамхўрлик” марказида болаларга зўравонлик қилингани аниқланди
Ўрганиш якунларига кўра, 6 нафар тарбиячи ва 1 нафар ҳамшира ишдан бўшатилди.
Андижон вилояти Қўрғонтепа туманида жойлашган ногиронлиги бўлган болалар учун «Ғамхўрлик» марказида болаларга нисбатан жисмоний зўравонлик қилингани акс этган видеолар ижтимоий тармоқларда тарқалди.
Мазкур ҳолат юзасидан Ижтимоий ҳимоя миллий агентлиги Андижон вилояти бошқармаси ходимлари томонидан ўрганиш ишлари олиб борилди.
Ўрганиш натижаларига кўра, видеоларда акс этган 6 нафар тарбячи ва 1 нафар ҳамшира эгаллаб турган лавозимидан озод этилган. Улар билан тузилган меҳнат шартномалари қонунчиликда белгиланган тартибда бекор қилинган.
Шунингдек, тарбиячилар фаолиятини етарли даражада назорат қилмаган масъул ходимларга нисбатан интизомий чоралар кўрилган.
Марказдаги болалар ҳудудий тиббиёт бирлашмаси мутахассислари иштирокида тиббий кўрикдан ўтказилган.
Бундан ташқари, болалар хавфсизлигини таъминлаш мақсадида «Ғамхўрлик» марказидаги ўйин майдонлари атрофига қўшимча кузатув камералари ўрнатилган.
