1 августдан Тошкент–Новосибирск йўналишида автобус қатнови тикланади
Транспорт вазирлиги қантов куни ва чипта нархини маълум қилди.
Эртага, 1 августдан бошлаб Тошкентдан Россия Федерациясининг Новосибирск шаҳрига мунтазам автобус қатновлари қайта тикланади. Бу ҳақда Транспорт вазирлиги ахборот хизмати маълум қилди.
Қайд этилишича, мазкур йўналишда “Yulduz-SX” хусусий корхонаси ўзининг “Yutong” русумли автобусларида қатновларни амалга оширади.
Тошкент – Новосибирск йўналишида қатновлар ҳафтанинг ҳар душанба куни бажарилади. Ушбу йўналишда автобуслар “Тошкент” автовокзалидан соат 14:00 да ҳаракатланишни бошлайди. Чипта нархи 803 000 сўм этиб белгиланган.
Новосибирск – Тошкент йўналишида қатновлар ҳафтанинг ҳар жума куни амалга оширилади. Автобуслар маҳаллий вақт билан соат 14:00 да Тошкент томон йўлга чиқади.
