Олий таълим, фан ва инновациялар вазирлигининг маълум қилишича, академик лицей ва касбий таълим муассасалари педагоглари учун аттестация 16 декабрь куни тест шаклида амалга оширилади.
Аттестация синовлари “testadmin.uzedu.uz” платформаси орқали марказлаштирилган ҳолда, белгиланган 14 та ҳудуддаги биноларда реал вақт режимида (онлайн) ўтказилади.
Тест синовлари уч сменада ташкил этилади:
- 1-смена – соат 09:00;
- 2-смена – соат 11:30;
- 3-смена – соат 14:00.
Педагоглардан синовга паспорт ёки ID-карта ҳамда педагог рухсатномаси билан келишлари талаб этилади. Рухсатномани “pedagog.edu.uz” платформаси орқали юклаб олиш мумкин.
Аттестация натижаларидан норози бўлган педагоглар эълон қилинган кундан бошлаб 10 кун ичида апелляция комиссиясига шахсан ёки «pedapellatsiya@edu.uz» расмий электрон почтаси орқали мурожаат қилишлари мумкин. Апелляция вақти 09:00–18:00 соатлари оралиғида амал қилади.
Вазирлик педагогларнидан белгиланган вақтга қатъий риоя қилиш ва тест синовларидан камида 30 дақиқа олдин етиб келишни сўради.