Андижон вилоятининг Шаҳрихон туманида ижтимоий тармоқларда шаҳидлик ҳақида гаплашган синфдошларга жиноий иш очилди. Бу ҳақида вилоят ИИБ хабар бермоқда.
Қайд этилишича, Шаҳрихон туманида яшовчи 2007 йилда туғилган шахс Ўзбекистонда тақиқланган сайтлардаги материаллар билан танишиши оқибатида Сурия ва бошқа нотинч давлатлардаги халқаро террорчилик ташкилотларининг медиа маркази йўлловчилари таъсирига тушиб қолган. Инстаграм ижтимоий тармоғи ва Телеграмда “Аҳли сунна эдитлар” гуруҳини тузган ва ўзига Абу Бакр тахаллусини қўйиб, фаолият юритган.
Мазкур гуруҳга саккиз нафар ўзи билан тенгдош бўлган, мактабда бирга таҳсил оладиган тенгдошларини қўшиб, улар билан шаҳидлик, жиҳод қилиш масаласида суҳбатлар олиб бориб, ҳатто ўзларига диний тахаллуслар ҳам қўйиб, бугунги кунда нотинч бўлган чет давлатларга чиқиб кетишни режалаштирган.
Андижон вилоятида ҳуқуқни муҳофаза қилувчи идоралар билан ҳамкорликда олиб борилган тадбирлар натижасида мазкур жамоат фаолиятига чек қўйилиб, гуруҳ аъзоларининг террорчилик ҳаракатлари содир этилаётган хорижий давлатларга чиқиб кетишининг олди олинди.
Мазкур ҳолат юзасидан Жиноят кодексининг 244-прим 1-моддаси учинчи қисми «г» банди ҳамда 244-прим 2-моддаси иккинчи қисми билан жиноят иши қўзғатилиб, тергов ҳаракатлари олиб борилмоқда.