Аномал иссиқ сабаб Ўзбекистонда поездлар тезлигига чеклов киритилди
Шунингдек, айрим йўловчи поездлар ҳаракат жадвалига ўзгартириш киритилган.
Ўзбекистонда аномал иссиқ кузатилаётгани сабабли поездлар тезлигига чеклов киритилади. Бу ҳақда “Ўзбекистон темир йўллари” АЖ хабар қилди.
Аввалроқ “Ўзгидромет” жорий йилнинг 25–29 июнь кунлари Ўзбекистон ҳудудига Туркманистон орқали Эрон ҳудудларидан иссиқ ҳаво кириб келишини маълум қилганди. Ҳозирда иссиқ ҳаво массалари кириб келишда давом этмоқда.
Бундай иссиқ ҳаво пайтида пўлат излардаги ҳарорат янада юқори бўлади. Шу боис, ҳаракат хавфсизлигини таъминлаш мақсадида аномал иссиқлик туфайли поездлар тезлигига чеклов белгиланган. Шу сабабли поездлар белгиланган манзилларга кечикиб бориш ҳолатлари кузатилади.
Бундан ташқари, ҳаво ҳароратининг кескин кўратилиши туфайли айрим йўловчи поездлар ҳаракат жадвалига ўзгартириш киритилган.
Хусусан, бугун:
—Тошкент–Бухоро йўналишида ҳаракатланадиган 10-сонли Шарқ поезди;
—Тошкент–Самарқанд йўналишида ҳаракатини амалга ошираётган 768Ф-сонли;
—Бухоро–Тошкент йўналишида ҳаракатланадиган 765 ҳамда 769 сонли“Афросиёб” замонавий поездлари;
—Хива–Андижон йўналишида ҳаракатланадиган 656 сонли;
—Хива–Бухоро йўналишида ҳаракатланадиган 50-сонли;
—Тошкент–Қўнғироқ йўналишида ҳаракатланадиган 54-сонли йўловчи поездлари манзилига ҳаракат жадвалидан кечикиб бориши кузатилмоқда.
