Германия вице-канцлери Ларс Клингбайл АҚШ президенти Дональд Трамп маъмурияти даврида Европа ва Қўшма Штатлар ўртасидаги трансатлантик муносабатлар жиддий синовга дуч келаётганини маълум қилди. Унинг айтишича, анъанавий иттифоқчилар ўртасидаги ишонч тобора сусайиб бормоқда. Бу ҳақда Euronews хабар бермоқда.
Клингбайл 14 январь куни Берлинда сўзлаган нутқида “биз билган трансатлантик муносабатлар ҳозирда парчаланмоқда” дея таъкидлади. У ушбу фикрга яқин кунларда Вашингтонга қилган ташрифи чоғида янада ишонч ҳосил қилганини билдирди.
вице-канцлер бу ҳолатга бир қатор омиллар сабаб бўлаётганини қайд этди. Жумладан, АҚШнинг Венесуэлада амалга оширган ҳарбий ҳаракатлари халқаро ҳуқуқ тамойилларига зид эканини, шунингдек, Трамп маъмуриятининг Лотин Америкаси давлатларига нисбатан таҳдидли баёнотлари хавотир уйғотаётганини айтди. Шу билан бирга, Гренландия масаласи ва Европага оид кескин баёнотлар ҳам ишончга путур етказаётгани қайд этилди.
Клингбайлнинг таъкидлашича, Германия ва АҚШни узоқ йиллар давомида эркин савдо ва очиқ бозорлар бирлаштириб келган. Бироқ ҳозирги шароитда Европа қоидаларга асосланган савдо тизимини ҳимоя қилишда мустақил ҳаракат қилишга тайёр бўлиши керак. Унинг сўзларига кўра, Европа ўз манфаатларини ҳимоя қилишда ҳатто АҚШ иштирокисиз ҳам қатъий позицияни сақлаб қолади.