АҚШда ўйинчоқ тўппонча билан талончилик қилган эркак 40 йилдан сўнг озодликка чиқариляпти
Ўйинчоқ тўппонча билан талончилик қилиб, умрбод қамоқ жазосига ҳукм қилинган жиноятчи озодликка чиқмоқда. Бу ҳақда “New York Post” хабар қилди.
Маълум бўлишича, 70 ёшли Ролф Кэстел бу жиноятни 1981 йили содир этган. Эркак Арканзас штатининг Форт Смит шаҳридаги тамаддихонага кирган ва ходимларни тўппонча ёрдамида қўрқитиб, пул беришларини талаб қилган.
Эркак қўлга олинганида у ҳисобчини болалар учун мўлжалланган ўйинчоқ тўппонча билан қўрқитгани маълум бўлган.
Суд талончини умрбод қамоқ жазосига ҳукм қилган ва у умрининг 40 йилини панжара ортида ўтказган.
Инсон ҳуқуқлари ташкилотлари Кэстелни озод қилиш учун кўп йил курашди. Бундан ташқари, ўйинчоқ тўппонча билан пуллари ўмарилган ошхона ҳисобчиси ҳам унинг озод этилишини қўллаб-қувватлаган, — дейилади хабарда.
21 сентябрь куни Арканзас жазодан озод қилиш кенгаши матбуот котиби Кэстелнинг илтимосномаси маъқуллангани ва тез орада қамоқдан озод қилиниши мумкинлигини тасдиқлаган.
Аввалроқ АҚШда 5 нафар журналист қотилига 345 йил қамоқ жазоси тайинлангани ҳамда Россиянинг Пермь давлат университетида ўқиган собиқ талаба қуролланган ҳолатда ўқув биноси ичига бостириб киргани ҳақида хабар берилганди.
Муножат Валиева
