Арманистон бош вазири Никол Пашинян ва Озарбайжон Президенти Илҳом Алиев Санкт-Петербургда МДҲга аъзо давлатлар раҳбарларининг норасмий учрашуви доирасида Арманистон-Озарбайжон тинчлигига оид масалаларни муҳокама қилди. Бу ҳақда Арманистон бош вазири матбуот котиби хабар берди.
Россия Президенти матбуот котиби Дмитрий Песков ҳам Пашинян ва Алиев тинчлик музокараларини якунлаш ва ягона тинчлик шартномасига эришишга тайёр эканликларини билдиришганини маълум қилган.
Ўтган йили Ереван ва Боку Россия, АҚШ ва Европа Иттифоқи воситачилигида бўлажак тинчлик шартномасини муҳокама қила бошлаган эди. Озарбайжон раҳбари Илҳом Алиев айтганидек, агар Ереван ўз позициясини ўзгартирмаса, Озарбайжон ва Арманистон йил охиригача тинчлик шартномасини имзолаши мумкин.