Таиландда туристлар учун янги йиғим: хорижлик сайёҳлардан 13,5 доллар ундирилиши мумкин
Йиғимни ундиришни 2027-йилнинг биринчи чорагидан бошлаш режалаштирилмоқда.
Таиланд ҳукумати мамлакатга кирадиган хори жликсайёҳлар учун 450 бат (қарийб 13,5 доллар) миқдорида ягона йиғим жорий этиш масаласини муҳокама қилмоқда.
Дастлаб самолётда келадиган сайёҳлардан 300 бат, қуруқлик ва денгиз орқали кирувчилардан эса 150 бат ундириш режалаштирилган эди. Эндиликда кириш усулидан қатъи назар, барча саёҳатчилар учун ягона 450 батлик йиғим белгилаш таклиф қилинмоқда.
Йиғимни дастлаб ҳаво орқали келадиган сайёҳлардан ундириш, кейинчалик эса қуруқлик ва сув орқали чегарани кесиб ўтувчиларга ҳам татбиқ этиш режалаштирилган.
Ташаббус муаллифларига кўра, фақат авиайўловчилардан олинадиган йиғим йилига 12 млрд батдан (қарийб 360 млн доллар) ортиқ маблағ тўплаши мумкин. Механизм тўлиқ ишга туширилгач, тушум 15 млрд батга (450 млн доллар) етиши кутилмоқда.
Таиланд жамоатчилик билан алоқалар департаменти йиғилган маблағлар туризм инфратузилмасини модернизатсия қилиш ва хавфсизлик стандартларини оширишга йўналтирилишини билдирган.
Йиғимни ундиришни 2027-йилнинг биринчи чорагидан бошлаш режалаштирилмоқда. Ҳозир лойиҳа жамоатчилик муҳокамасидан ўтказилмоқда ва жараён 28-сентабрда якунланади. Шундан сўнг ҳужжат Туризм сиёсати бўйича миллий қўмита ва ҳукумат томонидан кўриб чиқилади.
