Қозоғистон мудофаа вазири ишдан олинди: қарор 14 ҳарбий ҳалок бўлганидан кейин қабул қилинди
Бундан аввал Қосим-Жўмарт Тоқаев Мудофаа вазирлигидаги ишлар ҳолатини комплекс текшириш учун махсус комиссия тузишни топширган эди.
Қозоғистон президенти Қосим-Жўмарт Тоқаев Даурн Косановни мудофаа вазири лавозимидан озод этди. Тегишли фармон давлат раҳбари томонидан имзоланди.
Генерал-лейтенант авиация Даурн Косанов 2025 йил 8 июндан буён Мудофаа вазирлигига раҳбарлик қилиб келаётган эди.
Кадрлар бўйича қарор Манғистау вилоятида ўтказилган ҳарбий машғулотлар вақтида 14 нафар ҳарбий хизматчи ҳалок бўлганидан бир неча кун ўтиб қабул қилинди. Фожиа Каспий денгизида Қозоғистон Ҳарбий-денгиз кучларининг ўқув машғулотлари вақтида юз берган.
Бундан аввал Қосим-Жўмарт Тоқаев Мудофаа вазирлигидаги ишлар ҳолатини комплекс текшириш учун махсус комиссия тузишни топширган. Комиссия, хусусан, ҳарбий қисмларнинг молиявий ва моддий-техник таъминотини текшириши белгиланган.
Комиссия таркибига Хавфсизлик кенгаши ҳамда Олий аудиторлик палатаси вакиллари киритилади.
Косановнинг лавозимидан озод этилгани ҳақидаги расмий хабарда қарорнинг сабаблари кўрсатилмаган. Фармон имзоланган кундан кучга киради.
