Бирлашган Миллатлар Ташкилотининг Инсон ҳуқуқлари бўйича идораси АҚШдаги Алабама штатинининг ўлим жазосига ҳукм қилинган маҳбусларни азот гази орқали қатл қилиш қарорини қораламоқда.
Таъкидланишича, бу шахсга нисбатан қийноқ ҳисобланади ва халқаро ҳуқуқ меъёрларини бузади. Шунингдек, идора ёлланган қотиллик учун 25 январь куни қатл этилиши режалаштирилган маҳбусга нисбатан мазкур жазо қўлланилмаслигини талаб қилмоқда.
Бу ҳақда БМТнинг Инсон ҳуқуқлари бўйича бошқармаси матбуот котиби Равина Шамдасани хабар берди. Маълумотларга кўра, Европада фармацевтика компанияларига қатл қилиш учун ишлатиладиган дори-дармонларни сотиш тақиқланганлиги сабабли баъзи ҳудудлар ҳукмни амалга ошириш учун отиб ўлдириш усулидан фойдаланмоқда. Алабама, Миссисипи ва Оклахома штатлари эса азотга асосланган қатл тизимини жорий қилган.