Буюк Британия ҳукумати Исроилнинг Ғазо секторини тўлиқ босиб олишга уринган тақдирда унга қарши янги санкциялар жорий этиш масаласини кўриб чиқмоқда. Бу ҳақда The Sunday Times нашри хабар берди.
Манбага кўра, мамлакатнинг бир нечта вазирликларига Исроилнинг бундай ҳаракатларига жавобан “асосли” чекловлар ишлаб чиқиш вазифаси юклатилган. Хусусан, Мудофаа вазирлиги исроиллик ҳарбийларнинг Буюк Британия ҳудудида ўқув машғулотларида қатнашишини тақиқлаш имкониятини ўрганмоқда.
Шунингдек, Ташқи ишлар вазирлиги Биньямин Нетаняху ҳукуматига Ғазо устида тўлиқ назорат ўрнатиш мумкин эмаслигини кўрсатиб қўювчи турли эҳтимолий санкцияларни таҳлил қилаётгани айтилади.