Пойтахтда банк ходимлари кечки инкассация ва экспертизани ўтказиш жараёнида 2 евролик 2 470 дона жами 4 940 евро қийматидаги қалбаки тангаларни аниқлашди. Бу ҳақда Тошкент шаҳар ИИББ матбуот хизмати хабар қилди.
Ўтказилган тезкор-қидирув тадбирлари натижасида ушбу жиноятни 41 ёшли M.B. исмли шахс содир этганлиги маълум бўлди. У қалбаки тангаларни 31 ёшли Ж. М. дан харид қилган ва 59 280 000 сўмга валюта операцияларини амалга оширган.
Ҳозирда мазкур ҳолат юзасидан Ўзбекистон Республикаси Бош прокуратураси ҳузуридаги Иқтисодий жиноятларга қарши кураш департаменти томонидан Жиноят кодексининг 176-моддаси 2-қисми билан (“Қалбаки пул, акциз маркаси ёки қимматли қоғозлар ясаш, уларни ўтказиш”) жиноят иши қўзғатилди.
176-моддага, кўра, ушбу жиноят учун беш йилдан ўн йилгача озодликдан маҳрум этиш назарда тутилган.
Аввалроқ Янгийўл шаҳрида сохта пул тайёрлаган шахслар ушлангани ва қалбаки долларга телефон сотиб олган фирибгарнинг қўлга олингани хабар қилинганди.
Жавоҳирбек Турсунов