Туркия президенти Ражаб Тоййиб Эрдоған АК партиянинг Кенгайтирилган вилоят раҳбарлари йиғилишида нутқ сўзлаб, Исроилнинг инсонпарварлик ёрдами етказиш учун йўлга чиққан “Сумуд флотили”га ҳужумини кескин қоралади.
Давлат раҳбари Ғазода болалар очликдан ўлаётган бир пайтда халқаро флотилияга нисбатан босқинчилик амалга оширилганини “инсониятга қарши ваҳшийлик” деб атади.
“Сумуд флотили яна бир бор бутун дунёга Ғазодаги геноцид сиёсати ва Исроилнинг қирғинбаротчи юзини кўрсатди. Нетаняху ҳукумати тинчликнинг қарор топишига ҳам, ҳатто бундай имкониятнинг пайдо бўлишига ҳам тоқат қила олмаслигини исботлади”, — деди Президент.
Эрдоған Туркия фаластинлик биродарларини ҳеч қачон ёлғиз қолдирмаслигини, ўт очишни тўхтатиш ва тинчликни таъминлаш учун бор кучини сафарбар қилишини таъкидлади.
Шунингдек, Президент мутасадди идоралар вазиятни диққат билан кузатаётгани, флотилия сафарда бўлган Туркия фуқароларининг хавфсизлиги учун барча чоралар кўрилаётганини маълум қилди.