Сўнгги 24 соат ичида Исроил қамалидаги Ғазо секторида яна 6 нафар фаластинлик очликдан нобуд бўлди ва қурбонлар сони 175 нафарга етди. Бу ҳақида Ғазо Соғлиқни сақлаш вазирлиги бош директори Мунир ал-Бурш маълум қилди.
Ижтимоий тармоқларда эълон қилинган баёнотда Бурш очликдан ўлганлар орасида 93 нафар боланинг ҳам борлигига аниқлик киритди.
Маълумот учун, Ғазо сектори Исроил зарбалари ва инсонпарварлик ёрдами оқимига тўсқинлик қилувчи қаттиқ блокада остида қолмоқда, ҳудудда озиқ-овқат, сув, дори-дармон, тиббий ва гигиена воситаларининг кескин танқислиги кузатилмоқда.
Айниқса, болалар ўртасида очликдан ўлганлар сони тез ўсиб бормоқда. Маҳаллий ва халқаро ташкилотлар Исроил Ғазо секторида очлик ва ташналикдан қурол сифатида фойдаланаётганини қораламоқда.
2023 йил 7 октябрдан бери Исроилнинг Ғазо секторига уюштирган ҳужумлари оқибатида камида 60 430 фаластинлик ҳалок бўлди ва яна 148 722 киши яраланди.