Саудия Арабистони чемпионатига эътибор нисбатан пасаяётгандек. Аммо, лигада ҳали ҳам кўплаб юлдуз футболчилар ва таниқли мураббийлар бор. Афтидан, "Ал-Ҳилол" ўтган йилги натижани такрорламоқчи. Олтита учрашувда олтита ғалаба, 18 та гол урилган (лигадаги энг яхши натижа), жадвалда биринчи ўрин. Миллий терма жамоалар учун октябрь ойидаги танаффусдан сўнг Саудия Арабистони чемпиони "Ат-Таавун", "Ал-Наср" ва "Ал-Иттифоқ" жамоалари билан куч синашади. Бу рақибларнинг ҳар бири кучли 8 таликдан жой олган. Хорхе Жезус жамоаси жадвалда таъқибчиларидан сезиларли фарқ билан олдинга чиқиб олиши мумкин. Дарвоқе, "Ал-Ҳилол" нафақат чемпионатда, балки бошқа турнирларда ҳам ажойиб статистикага эришмоқда.
Саудия Арабистони чемпионатида Криштиану Роналду тўпурарлар пойгасида тўртинчи ўринда бормоқда. "Ал-Наср" чемпионатда ҳали мағлуб бўлмади (тўртта ғалаба, икки дуранг), аммо жамоа "Ал-Ҳилол"дан тўрт очко ортда қолмоқда. Мавсум бошида клуб мураббийни алмаштирди. Стефано Пиоли жамоа мураббийига айланди. Ҳозирча италиялик мутахассис яхши ишламоқда - барча турнирларда бешта ўйинда бешта ғалаба, иккита гол ўтказиб юборилган. Тез орада "Ал-Наср" "Ал-Шабаб" (лиганинг тўртинчи жамоаси) ва "Ал-Ҳилол" билан тўқнаш келади. Яқинда Роналду яна бир бор ўз номини футбол тарихига ёзиб қўйди. У 600 та гол урган биринчи футболчига айланди. Энг яқин таъқибчиси билан орадаги фарқ 44 тани ташкил қилади.
"Ал-Иттиҳод" ҳам бу мавсумни янги мураббий қўл остида ўтказмоқда. Аввалроқ жамоани Нуно Эспирито Санто ва Марсело Галлардо бошқарган - иккаласининг ҳам Карим Бензема билан муносабатлари ёмон эди. Афтидан, ҳужумчи энди Лоран Блан билан тил топишиб олган. Карим олти турда еттита гол урди (лигада иккинчи ўринда) ва ўтган мавсумда у тўққизта гол урганди. Франциялик футболчининг ўйини жамоасига ажойиб ғалабаларни тақдим этмоқда. Карим ҳар бир учрашувда гол уриб келмоқда. "Ал-Иттиҳод" олти учрашувда бешта ғалабага эришди. Фақатгина "Ал-Ҳилол"га имкониятни бой берди. Қолаверса, Жидда жамоаси Чемпионлар лигасида иштирок этмайди, шунингдек жамоада топ футболчилар кам.
"Аш-Шабаб" танаффусга жадвалда тўртинчи ўринни эгаллаган ҳолда йўл олди. Жамоанинг таркибида Европанинг топ-лигаларида ўйнаган тажрибали футболчилар (Янник Карраско, Жакомо Бонавентура) бор. Олти тур якунларига кўра, жамоа атиги бешта гол урди ва учта гол ўтказиб юборди.
Бу мавсумдан Олий лига иштирокчисига айланган "Ал-Қодисия" айни дамда олтинчи ўринда бормоқда. Мавсум бошланишидан олдин жамоа ўз таркибини Бельгия терма жамоаси дарвозабони Коэн Кастелс, "Реал"нинг собиқ сардори Начо Фернандес ва тўпурар Пер-Эмерик Обамеянг билан кучайтирди. "Ал-Қодисия" турнирни иккита ғалаба билан бошлаган бўлсада, кейинги ўйинларда омадсизликка учради.
Таркибида Франк Кессиер, Риёд Маҳрез, Роберто Фирмино ва Иван Тоней бўлган “Ал Аҳли” ҳам бироз муваффақиятсизликка дуч келмоқда. Олти учрашувда учта мағлубият, Саудия Арабистони чемпионати жадвалида 10-ўрин. "Ал-Аҳли"нинг сафардаги ёмон статистикаси эътиборга молик - учта ўйинда бир очко.
Стивен Жеррард бошчилигидаги "Ал-Иттифоқ" ҳозирча турнир жадвалида саккизинчи ўринни эгаллаб турибди. Бошқа томондан, жадвалдаги жамоалар шундай зич жойлашганки, иккинчи ўриндан фарқ беш очкони ташкил этади. Голларнинг ярмидан кўпи (учтаси) аввалроқ "Лион", "Атлетико" ва "Селтик" клубларида тўп сурган ҳужумчи Мусса Дембеле ҳисобига ёзилган.