Ўзбекистон спортчилари қишки Олимпия ўйинларидаги иштирокини медалсиз якунлади
Мамлакат шарафини шорт-трекчи Даниил Ейбог ва тоғ чанғичиси Медет Назаров ҳимоя қилди.
Ўзбекистон спортчилари қишки Олимпия ўйинларидаги иштирокини медалсиз якунлади. Мамлакат шарафини шорт-трек бўйича Даниил Ейбог ҳамда тоғ чанғиси йўналишида Медет Назаров ҳимоя қилди.
Шорт-трек баҳсларида Даниил Ейбог 1500 метр масофада чорак финал босқичидан муваффақиятли ўтиб, ўз гуруҳида 2:16.963 натижа билан учинчи бўлиб ярим финал йўлланмасини қўлга киритди. Кейинчалик «Б» финалида қатнашган спортчи бешинчи бўлиб маррага етиб келди ва умумий ҳисобда ушбу масофани 14-ўринда якунлади.
Шунингдек, у 500 метр масофадаги саралаш босқичидан ҳам муваффақиятли ўтди. Чорак финал баҳсларида маррага бешинчи бўлиб етиб келган Ейбог ярим финал йўлланмасини қўлга кирита олмади ва шорт-трек йўналишидаги иштирокини якунлади.
Тоғ чанғиси бўйича Медет Назаров гигант-слалом дастурида икки уринишни амалга оширди. Биринчи стартда 1:25.75, иккинчи уринишда эса 1:21.14 натижа қайд этиб, жами 2:46.89 кўрсаткич билан мусобақани 50-поғонада якунлади.
Слалом дастурида эса спортчи биринчи стартда 1:07.51 натижа кўрсатди. Бироқ иккинчи стартни якунлай олмади ва ушбу йўналишдаги баҳсларни муддатидан аввал тугатди. Шу тариқа, тоғ чанғичининг Олимпиададаги иштироки ҳам ниҳоясига етди.
