“Дарҳол йўлга чиқ”: Трамп Роналдуни АҚШга чақирди
Америка раҳбари Криштиануни энг буюк футболчи деб атади.
АҚШ Президенти Доналд Трамп дунёга машҳур португалиялик футболчи Криштиану Роналдуни Америкага келишга чақирди. Ижтимоий тармоқларда тарқалган видеомурожаатда Трамп Роналдуни “барча даврларнинг энг буюк футболчиси” деб атаган.
“Криштиану Роналду, сен барча даврларнинг энг буюк футболчисисан. Америкада сен бизга кераксан. Дарҳол йўлга чиқ — биз томон тезроқ келишинг керак”, деган Трамп мурожаатида.
Видео қисқа форматда эълон қилинган бўлиб, унда сунъий интеллект ёрдамида яратилган саҳналар ҳам мавжуд. Айрим лавҳаларда Трамп ва Роналду Оқ Уй ҳудудида футбол ўйнаётгандек тасвирланган.
Мазкур баёнот 2026 йилги футбол бўйича Жаҳон чемпионати арафасида янгради. Маълумки, турнир АҚШ, Канада ва Мексика мезбонлигида ўтказилади.
Кузатувчилар Трампнинг чақириғини бир неча йўсинда талқин қилмоқда.
Хусусан, Роналдуни АҚШнинг МЛС лигасига таклиф қилиш эҳтимоли бор. Ёки Жаҳон чемпионати олдидан футболга қизиқишни оширишга қаратилган рамзий мурожаат бўлиш мумкин.
Ҳозирда Роналду Саудия Арабистонининг “Ал-Насср” клубида тўп сурмоқда. У ҳали мазкур чақириққа расмий муносабат билдирмаган.
