Кеча, 5 февраль куни Криштиану Роналду 40 ёшга тўлди. Юбилей ёш олдидан португалиялик футболчи журналист Эдуардо Агиррега интервью берди. У Ла Cехта каналида элон қилинди. Унда Роналду тарихдаги энг яхши футболчи ва клуб номини айтди. Келажак ҳақидаги фикрлари билан ўртоқлашди. Ҳатто "Реал Мадрид"га қайтишини ҳам инкор этмади. Қуйида Роналдунинг интервьюсидан эътиборга молик фикрларини келтирамиз.
Мбаппе ҳақида
"Агар мен Мбаппенинг ўрнида бўлганимда, ҳужумчи сифатида ўйнаган бўлардим. "Реал"да бўлганимда унга шу позицияда ўйнашни ўргатардим. Мен клубда тўққизинчи рақамда эмасдим, лекин марказий ҳужумчи сифатида ўйнадим. Одамлар қанот ҳужумчиси эканлигимни унутишди. Ҳужумкор позиция Мбаппенинг ўйинини бироз мураккаблаштиради. "Реал Мадрид" мухлисларига мурожаат қилмоқчиман - Мбаппега эътиборли бўлинг. У жуда яхши футболчи ва "Реал" унга ёрдам бериши ҳамда ҳимоя қилиши керак”.
Тарихдаги энг яхши футболчи
“Мен энг яхши тўпурар ва кучли футболчиман. Мен ҳеч қачон ўзимдан яхшироқ футболчини кўрмаганман. Буни чин юракдан айтяпман. Месси, Пеле ва Марадонани ҳурмат қиламан. Мен футболдаги ҳамма нарсани қила оламан. Бошда яхши ўйнайман, жарима зарбаларини аъло даражада бажараман ва чап оёғим билан ҳам яхши зарба бероламан”.
Саудия Арабистони ёки МЛС
“Саудия Арабистонига келишга қарор қилганимда, лига бунчалик тез ўсади деб ўйламагандим. Аммо, бир-икки йил ичида у ҳозиргидек юқори даражага чиқишига ишонардим. Мазкур чемпионатни МЛС билан солиштириш хато".
Месси билан рақобат
“Биз 15 йил давомида футбол саҳнасини баҳам кўрдик ва ҳар доим яхши муносабатда бўлганмиз. Эсимда, бир марта мен унга инглиз тилидан таржимонлик қилганман. Месси доим менга яхши муносабатда бўлган, ўз клуби ва жамоасини ҳимоя қилган, мен ҳам шундай. Биз бир-биримизга мотивация берганмиз".
Мураббий қандай бўлиши керак
“Мураббий собиқ футболчи бўлиши керак. Ундай бўлмаса у муваффақиятга эришиши қийин бўлади. Тарихга назар ташласангиз, энг яхши 50 нафар мураббийдан 48 нафари аввал футболчи бўлган. Лекин, менинг севимли мураббийим йўқ. Шу билан бирга, менда ҳам жуда ёмон мураббийлар бўлган. Улар футбол ҳақида ҳеч нарсани тушунишмайди".
Мадридга қайтиш
“Балки фаолиятим тугаганидан кейин нимадир содир бўлар. "Реал Мадрид"даги фаолиятим футбол нуқтаи назаридан мен учун энг бахтли давр бўлди".
"Олтин тўп"га бўлган муносабат ҳақида
"Виниcиус "Олтин тўп"га лойиқ эди. Бу мукофот энди ҳеч қандай ваколатга эга эмас. Мен ҳайрон бўлдим. Вини "Олтин тўп"га лойиқ эди, лекин уни ололмади, шунинг учун маросимга энди ишонч йўқ".
"Манчестер Юнайтед" ўрнига "Барселона" бўлиши мумкин эди
"Спортинг"да ўйнаб юрганимда "Барселона"га ўтишим мумкин эди. Улар мен билан шартнома имзолашни хоҳлашди. Бироқ, бу содир бўлмади, чунки трансферни кейинги мавсумда ташкил қилишмоқчи эди. "Манчестер Юнайтед" эса мени дарҳол олиб кетди".
Мотивация
“Мен ҳали ҳам машғулот ўтказишни ва футбол ўйнашни яхши кўраман. Сизнингча, мен ҳар куни спорт залига хоҳиш билан бораманми? Йўқ, лекин мажбурият борлиги сабаб мен у ерга бораман".
Келажак
“Келажагим мени рағбатлантирадиган, жамиятга, ёшларга ёрдам берадиган нарсалар билан боғлиқ: меҳмонхоналар, клиникалар, реабилитация марказлари. Ўзимни қизиқтирадиган нарсаларни қиламан. Аммо, мен бу вақт яқин эмас деб ўйлайман".