Наманганда боғча боласи тилини чайнаб юбориб, вафот этди
Ҳолат юзасидан вазирлик маълумот берди.
Кеча, 1 август куни Наманган вилоятининг Чуст туманидаги 64-сонли давлат мактабгача таълим ташкилотида 5 ёшли бола тилини чайнаб юбориб, вафот этди. Ҳолат юзасидан вазирлик маълумот берди.
Дастлабки ўрганиш натижаларига кўра, 2017 йилда туғилган А. Ш. 1 август куни эрталаб МТТга қабул қилинган. Таълимий фаолиятга яхши қатнашган. Кун тартибига мувофиқ тушлик қилган ва гигиена қоидаларига амал қилгач барча тарбияланувчилар қатори ухлашга ётган.
Тарбиячи уйқудан уйғониш вақти бўлганда аввал қиз болаларни, сўнгра ўғил болаларни ҳожатга олиб чиқиш учун уйқудан уйғотган. Лекин бола бошини кўтарган ва яна ётиб олган. Қизларни ҳожатдан олиб келиб А.Ш.ни уйғотган. Шунда бола тилини чайнаб юборганлигини кўрган ва зудлик билан ҳамширани олдига биринчи ёрдам кўрсатиш учун кўтариб олиб чиққан.
МТТ ҳамшираси болага биринчи тиббий ёрдамни қилиб зарурий муолажаларни амалга оширган ва тез тиббий ёрдамга хабар берилган.
Тиббиёт ходимларининг ҳаракатларига қарамай бола вафот этган. Ўлим ҳақидаги маълумотномага асосан, J22 Қуйи нафас йўлларининг аниқланмаган ўткир респиратор инфекцияси; J81 Ўпка шишиши ўлим сабаби этиб кўрсатилган.
Ушбу ҳолат юзасидан 2 август куни вилоят Мактабгача таълим бошқармаси тезкор гуруҳи томонидан дастлабки ўрганиш ўтказилган ҳамда тегишли маълумотлар ва ҳужжатлар тўпланган. Ҳозирда ҳолат юзасидан тергов ишлари амалга оширилмоқда.
