Ўзбекистондаги бозорлар ва савдо нуқталарида ўтказилган текширувлар давомида 130 тоннадан ортиқ соғлиқ учун хавфли озиқ-овқат маҳсулотлари савдодан чиқарилди.
Санитария-эпидемиологик осойишталик ва аҳоли саломатлиги қўмитаси маълумотига кўра, мамлакат бўйлаб 300 га яқин деҳқон бозорида ўтказилган рейдларда сифатсиз ёки санитария талабларига жавоб бермайдиган маҳсулотлар аниқланган. Гўшт, сут, нон, салат ва қандолат маҳсулотларини белгиланган тартибни бузган ҳолда сотган 500 дан ортиқ шахс жаримага тортилди.
Қўмита вакилларининг таъкидлашича, мунтазам текширувлар аҳолига хавфсиз озиқ-овқат етказиб беришни таъминлаш ва овқатдан заҳарланиш ҳолатларининг олдини олишга қаратилган.
Рейдлар жараёнида бозорларнинг санитария инфратузилмасида мавжуд тизимли муаммолар ҳам қайд этилди. Хусусан, кўплаб савдо мажмуаларида гўшт ва сут маҳсулотларини сотиш учун мўлжалланган махсус павильонлар, ветеринария ва санитария лабораториялари, жамоат ҳожатхоналари ҳамда чиқинди тўплаш жойлари мавжуд эмаслиги аниқланди. Айрим бозорларда эса сув таъминоти ва оқова сув тизими умуман йўқ.
Шунингдек, санитария профилактикаси бўйича дезинфекция, дезинсекция ва дератизация хизматлари билан шартномалар тузилмагани ҳам кенг тарқалган муаммо сифатида қайд этилди.