24–25 январь кунлари Тошкент вилоятининг Бўстонлиқ туманида Экология, атроф-муҳитни муҳофаза қилиш ва иқлим ўзгариши вазирлиги ҳузуридаги Ўрмон хўжалиги агентлиги томонидан 2025 йил – “Атроф-муҳитни асраш ва «яшил» иқтисодиёт йили” муносабати билан ўрмон хўжаликларини ривожлантириш, амалга оширилган ишлар ва истиқболдаги режалар муҳокамасига бағишланган амалий семинар ўтказилди.
Семинарда нутқ сўзлаган Азиз Абдуҳакимов Президент ташаббуси билан ўрмонларни асраб қолиш борасида бир қанча ижобий ўзгаришлар юз бераётганини таъкидлади. Бироқ, шунга қарамай, соҳада ҳамон айрим камчиликлар сақланиб қолаётганини танқид остига олди.
Жаҳон банки мутахассиси Асферачю Абате Ўзбекистонда амалга оширилаётган лойиҳалар нафақат табиат муҳофазаси, балки аҳолининг турмуш даражасини ошириш учун ҳам улкан имкониятлар яратаётганини қайд этди.
Семинарда КОИСА (Корея халқаро ҳамкорлик агентлиги) ташаббуси билан 2024–2028 йилларда амалга ошириладиган лойиҳага ҳам эътибор қаратилди. Лойиҳада смарт технологиялар ёрдамида ўрмонларни қайта тиклаш, 6 та смарт иссиқхона қуриш, 1,7 млн туп хандон писта кўчатларини етиштириш, 5 гектар майдонда пистачилик илмий-тадқиқот станцияси ташкил этиш, шаҳарларни кўкаламзорлаштириш, 5 гектар ҳудудда махсус дарахт кўчатхоналари барпо қилиш, 50 гектар майдонда шаҳарлар учун мослаштирилган кўчатлар етиштириш, 300 000 туп дарахт ўстириш каби мақсадлар кўзда тутилган. КОИСА мутахассиси Ёон Таэгсеунг лойиҳа экологик муҳитни яхшилаш ва аҳоли учун қулай шароитлар яратишга қаратилганини таъкидлади.
ФАО бош техник маслаҳатчиси Наримон Нишонов эса ташкилот билан ҳамкорликда амалга оширилаётган ўрмонлар ва яйловларни барқарор бошқариш лойиҳаси мамлакатимизнинг иқлим ўзгаришига мослашиш ва табиий ресурслардан самарали фойдаланишга йўналтирилганлигини айтиб ўтди.
Таъкидлаш жоизки, мазкур халқаро лойиҳалар Ўзбекистонда ўрмон хўжаликларини барқарор ривожлантиришда муҳим ҳисобланади. Асосийси, мамлакатимизда амалга оширилаётган бу каби ислоҳотлар экологик барқарорликни таъминлаш ва иқтисодиётда «яшил» лойиҳалар улушининг сезиларли ортишига хизмат қилиши билан аҳамиятлидир.
Семинар якунида келгусида бажарилиши керак бўлган вазифалар белгилаб олинди. Шунингдек, иштирокчиларга ташаккурнома ва сертификатлар топширилди.