Покистон “Толибон”га муҳим соҳада разведка маълумотлари тақдим этмоқда — The Washington Post

 

Покистон “Толибон” га ИШИДга қарши курашда ёрдам бермоқда. Бу ҳақда The Washington Post хабар берди.

 

Исломобод норасмий каналлар орқали разведка маълумотлари ва техник воситалар орқали толибларнинг террорчиларга қарши курашда ёрдам беряпти. Хусусан, ҳозирда ИШИД аъзоларининг телефонлари ва интернет алоқалари аниқланмоқда ва Афғонистон расмийларига тақдим этилмоқда.

“Покистон бизнинг биродаримиз ва бизни турли соҳаларда қўллаб-қувватлаб келмоқда. Хусусан, маълумотлар ва разведка ахбороти бериляпти. Агарда АҚШ ва дунёнинг бошқа давлатлари ҳам шундай қилса, биз ИШИДни саноқли кунларда мағлуб этган бўлардик”, – деган номи сир қолишини истаган “Толибон” аъзоси.

 

Шу билан бирга, “Толибон” вакили Билол Каримийинг сўзларига кўра, ҳаракат ИШИДни жиддий хавф сифатида кўрмайди. Аммо аноним покистонлик манбалардан бири, Исломобод ва Кобул ўртасида юқоридаги масала юзасидан норасмий мулоқот бўлаётганини маълум қилган.

 

The Washington Post Покистонни ИШИДга қарши Афғонистонга ёрдам бераётган кам сонли давлатлардан бири сифатида эътироф этди. Айрим АҚШ амалдорлари минтақавий рақобат, чуқур илдиз отган ишончсизлик ва толибларнинг айрим ҳаракатлари терроризмга қарши курашда ҳамкорликни қийинлаштирмоқда. Шундай бўлса-да, АҚШ қўшинлари чиқиб кетгандан кейин ҳам разведка хизматлари “Толибон”га террорчилар ҳақида маълумот берганлиги таъкидланган. Аммо нашр маълумотларига кўра, толиблар кўп ҳолатда бу маълумотларга қизиқиш билдирмаган ва ишонч билан қарамаган.

 

Бундан аввал Афғонистонда яшайдиган қирғизлар Қирғизистонга кўчирилиши ҳамда АҚШ ҳаво ҳужуми натижасида "Ал-Қоида" раҳбарларидан бири ўлдирилгани хабар қилинганди.

 

Жаҳонгир Қўзиев