Айни пайтда Россия бўйлаб ҳар юз кишидан бири грипп билан касалланаётгани қайд этилмоқда. Айрим ҳудудларда эса бир ҳафта ичида беморлар сони икки бараварга ошган. Мутахассислар вазиятни диққат билан кузатиб, эпидемиологик ҳолат кескинлашиши мумкинлигини таъкидламоқда.
Шифокорлар жорий мавсумда асосий штамм сифатида Гонконг гриппи — А (H3N2) устун келаётганини маълум қилди. Ушбу вирус тез ривожланиши ва оғир асоратларга олиб келиши билан хавфли ҳисобланади. Айниқса, ҳомиладор аёллар, болалар, кексалар ҳамда сурункали касаллиги бор шахслар хавф гуруҳига киради.
Гонконг гриппи ўткир вирусли касаллик бўлиб, асосан нафас йўлларини зарарлайди. У юқори ҳарорат, кучли интоксикация, мушак ва бош оғриқлари билан кечади. Баъзи ҳолатларда кўнгил айниши ва ҳазм бузилиши ҳам кузатилади. Ушбу штамм илк бор 1968 йилда Гонконгда аниқланган бўлиб, ҳозирда мутацияга учраган ҳолда мавсумий грипп сифатида тарқалишда давом этмоқда.