14 октябрь куни Ўзбекистон Республикаси Президенти Шавкат Мирзиёев Россия Федерацияси Президенти Владимир Путин билан телефон орқали мулоқот қилди.
Суҳбат чоғида Ўзбекистон ва Россия ўртасидаги стратегик шериклик ва иттифоқчилик муносабатларини янада мустаҳкамлаш, ўзаро манфаатли ҳамкорликни янги босқичга кўтариш масалалари атрофлича кўриб чиқилди.
Давлат раҳбарлари икки томонлама савдо-иқтисодий ва инвестициявий алоқалар барқарор ўсиш суръатларини сақлаб қолаётганини мамнуният билан қайд этдилар. Шу билан бирга, минтақалар даражасидаги кооперация лойиҳаларини кенгайтириш ва қўллаб-қувватлаш зарурлиги таъкидланди.
Томонлар, шунингдек, маданият, санъат ва таълим соҳаларидаги ҳамкорликнинг изчил ривожланаётганини эътироф этдилар. Хусусан, муҳандислик соҳасида малакали кадрларни тайёрлаш йўналишида олиб борилаётган қўшма ташаббуслар юқори баҳоланди.
Суҳбат якунларида Президентлар Ўзбекистон ва Россия ўртасидаги дўстона муносабатларни мустаҳкамлаш ҳамда ўзаро алоқаларни янги мазмун билан бойитишга тайёрликларини билдирдилар.