Кеча, 12 август куни жиноят ишлари бўйича Тошкент шаҳар Учтепа туман судида Ўзбекистон журналистика ва оммавий коммуникациялар университети ректори Шерзодхон Қудратхўжа ҳақида ёлғон ахборот тарқатган йигитнинг иши кўриб чиқилди. Бу ҳақида Тошкент шаҳар судлари матбуот хизмати Zamon.uz'га маълум қилди.
Суд қарори билан Хакимов Азиз Адхамович Ўзбекистон Республикаси МЖтКнинг 202-2-моддаси 1-қисмида назарда тутилган ҳуқуқбузарликни (Шахснинг қадр-қиммати камситилишига ёки унинг обрўсизлантирилишига олиб келадиган ёлғон ахборотни тарқатиш, шу жумладан оммавий ахборот воситаларида, телекоммуникация тармоқларида ёки Интернет жаҳон ахборот тармоғида тарқатиш) содир этган деб топилган ва унга шу моддага асосан базавий ҳисоблаш миқдорининг 50 (эллик) баравари миқдорида, яъни 18.750.000 сўм жарима жазоси тайинланган.
Шерзодхон Қудратхўжа мазкур ишни жиноий тоифага ўзгартиришни, судланувчидан эса 500 миллион сўм товон пули талаб қилиш ниятида эканини қўшимча қилган.