Швейцариянинг жанубида жойлашган Кран-Монтана чанғи курортида Янги йил байрами арафасида юз берган ёнғин оқибатида қарийб 40 киши ҳалок бўлди. Ҳодиса 1 январга ўтар кечаси соат 01:30 атрофида Le Constellation номли барда содир бўлган. Расмий маълумотларга кўра, яна 115 киши турли даражадаги жароҳатлар билан шифохонага ётқизилган, уларнинг аксариятида оғир куйишлар аниқланган. Бу ҳақда мамлакат полицияси маълум қилди.
Фавқулодда хизматлар қисқа вақт ичида воқеа жойига етиб келган. Қутқарув ишларига 13 та вертолёт, 40 дан ортиқ тез ёрдам машинаси ва 150 га яқин қутқарувчи жалб этилган. Жароҳатланганлар Швейтсариянинг Сион, Лозанна, Тсюрих ва Женева шаҳарларидаги ихтисослашган тиббиёт муассасаларига жойлаштирилган. Расмийлар қурбонлар орасида бир нечта давлат фуқаролари борлигини билдирган.
Швейцария расмийлари ёнғин сабаблари ҳозирча аниқланмаганини, ҳодиса террорчилик билан боғлиқ эмаслигини таъкидлади. Воқеа юзасидан тергов ишлари бошланган. Ўзбекистон Ташқи ишлар вазирлиги ҳам ҳодисага муносабат билдириб, вафот этганлар ва жабрланганлар орасида Ўзбекистон фуқаролари аниқланмаганини маълум қилди ҳамда марҳумларнинг яқинларига чуқур ҳамдардлик билдирди.