Давлат хавфсизлик хизмати томонидан прокуратура ва Иқтисодий жиноятларга қарши курашиш департаменти билан ҳамкорликда ўтказилган тезкор тадбирлар давомида коррупция ҳолатлари фош этилди.
Сирдарё вилоятининг Ховос туманида ҳоким ўринбосари ҳамда вилоят инвестициялар, саноат ва савдо бошқармасининг туман бўлими мутахассиси фермер хўжалиги раҳбаридан ноқонуний йўл билан пул маблағларини талаб қилганликда гумонланмоқда.
Аниқланишича, улар фермер хўжалигини келгуси йил шоли етиштириш тақсимотига киритиш, экспорт режаси бажарилганини тасдиқлаш ва текширувларда “ҳимоя” қилиш эвазига 10 минг АҚШ доллари олган. Кейинчалик ер майдонини давлат захирасига олиш билан таҳдид қилиб, қўшимча 20 минг доллар талаб қилган.
Давлат хавфсизлик хизмати томонидан ўтказилган тезкор тадбирда ҳоким ўринбосари ва унинг ҳамтовоғи 10 минг доллар олаётган вақтда ушланди. Уларнинг ҳаракатларига чек қўйилиб, уларга нисбатан Жиноят кодексининг 165-моддаси 3-қисми “а” банди билан жиноят иши қўзғатилди ҳамда “қамоқ” эҳтиёт чораси қўлланди.
Шунингдек, Навоий вилояти Кармана туманида ҳоким ёрдамчиси ҳам пора олаётган пайтда ушланди.
Терговга кўра, у 2024 йилда бошқа фуқарога ижарага берилган M-37 автомобил йўли бўйидаги 12 кв.м ер майдонини бошқа шахс номига расмийлаштириб бериш эвазига 100 миллион сўм талаб қилган. Давлат хавфсизлик хизмати ва Департамент ходимлари томонидан ўтказилган тадбирда у 40 миллион сўм олаётганида қўлга олинган.
Ҳозирда ҳоким ёрдамчисига нисбатан жиноят иши қўзғатилиб, тергов ҳаракатлари олиб борилмоқда.