“Манчестер Сити” ярим ҳимоячиси Кевин Де Брюйнени бошқа клуб либосида тасаввур қилиш жуда қийин. Чунки, бельгиялик футболчи 2015 йилдан бери Англиянинг топ-жамоасида ўйнаб келмоқда. Кевиннинг амалдаги шартномаси 2025 йилнинг ёзида тугайди ва томонлар уни узайтириш борасида ҳали бир қарорга келмаган. Ярим ҳимоячи кейинги мавсумни қаерда ўтказиши ҳали аниқ эмас.
Де Брюйне янги шартнома борасидаги музокараларни мавсум бошида кейинга қолдирганди. Бунга жароҳат сабаб бўлган. Дастлаб зарарсиздек туюлган жароҳат футболчини икки ойга сафдан чиқарди. МЛСнинг "Сан-Диего" клуби футболчига қизиқиш билдирган. Манбага кўра, ярим ҳимоячининг атрофидагилар Америка жамоаси вакиллари билан ҳам суҳбатлашган. Бироқ манба футболчининг "Сан-Диего"га ўтиши ҳақидаги ҳар қандай маълумот ҳақиқатга тўғри келмаслиги таъкидланди. Ўтган мавсум охирида футболчига "Ал-Ҳилол", "Интер Маями" ва "Лос-Анжелес Гелакси" клублари ҳам қизиқиш билдирган.
Де Брюйне ўтган ёзда Бельгиянинг ҲЛН нашрига берган интервьюсида шундай деган эди: "Албатта, Саудия Арабистонига кўчиб ўтиш вариантини истисно қилмайман. Менинг ёшимда сиз барча вариантларни кўриб чиқишингизга тўғри келади. Бундан ташқари, биз ақл бовар қилмайдиган пул ҳақида гапиряпмиз. Икки йилдан сўнг Европада 15 йил ўйнаб топган пулимни ишлаш имконияти пайдо бўлганида қарши фикр билдириш қанчалик тўғри бўлади".
Де Брюйне деярли 10 йил давомида Премьер-лигада порлади. У ҳақли равишда ўз даврининг энг ёрқин футболчиларидан бири ҳисобланади. Де Брюйне жорий мавсумда жароҳат туфайли икки ойни ўтказиб юборди. Бельгиялик футболчи майдонга қайтгач, дастлаб учрашувлар охирида бир неча марта алмаштирилди. Январь ойида Кевин Премьер-лигада яхши ўйнади - учта ўйин, тўртта голли узатма.
Йил бошида "Манчестер Сити" бош мураббийи Пеп Гвардиола Кевиннинг мавсум иккинчи ярмидаги ўйини янги шартнома борасидаги вазиятга ойдинлик киритишига шама қилган эди. "Де Брюйне билан шартномани узайтириш менинг ишим эмас. Охирги бир ярим йил ичида у бошқа футболчилар каби муаммоларга дуч келди. Аммо Кевин барқарор ва соғлом бўлса, у биз учун жуда муҳим футболчи".
Айтганча, айнан шу сўзлардан сўнг ярим ҳимоячи Премьер-лиганинг учта учрашувида тўртта муваффақиятли узатмани амалга оширди. Кўринишидан, "Сити" раҳбариятини икки нарса ўйлантирмоқда. Биринчиси - ёш. Де Брюйне 33 ёшда (ёзда 34 ёшга тўлади). Кевин эса бу ёшда фойдали ўйинчи бўлишга қодир эканлигини исботлаши керак. Иккинчи нуқта - жароҳатлар. Сўнгги бир ярим йил ичида бельгиялик футболчи кўплаб ўйинларни ўтказиб юборди. Ҳеч ким ўйнашдан кўра даволаниш учун кўпроқ вақт сарфлайдиган футболчига пул тўлашни истамайди.
"Манчестер Эвенинг Невс" инглиз клуби футболчи билан шартномани узайтириши кераклигига ишонч билдирмоқда. "Шаҳарликларнинг ўйини, истеъдодлар кўп бўлишига қарамай, Де Брюйнега боғлиқ. Чунки, у ҳали ҳам жаҳон даражасидаги ўйинчи ҳисобланади. У 90 дақиқада ўртача кўрсаткичлар бўйича яхши статистикага эга. Кевиннинг ўзи музокаралар бошланишидан олдин муносиб даражага қайтишни хоҳлашини айтди. Кўриниб турибдики, у аллақачон тузалиб кетган, буни ҳозирги формаси ҳам кўрсатиб турибди. Де Брюйне "Манчестер Сити" учун жуда муҳим футболчи, шунинг учун клуб унинг маоши учун муносиб миқдорни тўлашга доим тайёр. Бундай вазиятда молиявий ва жисмоний муаммолар иккинчи ўринда туради.
Кевиннинг ўзи "Манчестер Сити" билан ҳали музокара ўтказмаганини таъкидлади: "Мен ҳали клуб билан гаплашмадим. Формага киришни хоҳлардим. Келажакда нима бўлишини вақт кўрсатади".
Мавсум тугашига тўрт ой бор ва томонлар ҳали тайинли музокаралар олиб боришмаган. "Атлетик" нашрининг таъкидлашича, Де Брюйне вакиллари "Сан-Диего" билан бир неча ойдан бери алоқада бўлиб туришибди. Агар Кевин "Сити"да қолмаса, у бошқа жамоа топишига тўғри келади. Очиғи, Де Брюйне "Сити" билан янги шартнома имзолайдими ёки йўқми, ҳозирча ҳеч қандай маълумот йўқ. Футболчининг жамоа таркибида сўнгги ойларини кузатаётган бўлишимиз ҳам мумкин.