Sputnik: Тошкент ва Кобул “Сурхон-Пули-Хумри” электр узатиш линияси қурилишини қайта тиклашни муҳокама қилди
Толибон ва Афғонистоннинг DABS энергетика компанияси вакиллари 25-30 декабрь кунлари мамлакатимиз пойтахтида бўлишган.
Бу ҳақида “Ўзбекистон Миллий электр тармоқлари” АЖ матбуот хизматига таяниб Sputnik Афганистан хабар тарқатди.
Унда айтилишича, 260 км. 500 кВ "Сурхон - Пули-Хумри" электр узатиш линиясини қуриш бўйича шартнома 2017 йил декабрь ойида имзоланган.
Мазкур лойиҳада Ўзбекистон Афғонистонга электр энергияси етказиб бериш ҳажмини 70 фоизга, йилига эса 6 миллиард кВт/соатгача ошириш мўлжалланган.
Уни тадбиқ этиш муддати 2 йил бўлиб, айни вақтда 45 километрлик Ўзбекистон участкасининг қурилиши аллақачон якунланган.
Лойиҳанинг нархи тахминан 150 миллион АҚШ доллари бўлиб, 2020 йил октябрь ойида Осиё тараққиёт банки Кобулга лойиҳани амалга ошириш учун 110 миллион доллар ажратган.
Маблағларнинг асосий қисми лойиҳа бўйича Ўзбекистонда амалга ошириладиган қурилиш ишларига сарфланиши режалаштирилган эди. Афғонистондаги можароли вазият туфайли лойиҳа ишлари вақтинча тўхтатилган.
Аввалроқ Ўзбекистон “Толибон” билан келишув асосида 150 қочқинни Афғонистонга қайтаргани ҳамда мамлакатимиз Афғонистондан яна 400 нафарга яқин қочқинни қабул қилгани ҳақида хабар берилганди.
Оламгир Абдиев
