Ўзбекистон Президенти сайлови кампанияси — Ўмон ОАВ нигоҳида
Ўмон Султонлигининг "Asdaa Oman" газетасида "Сайловолди тайёргарлик ишлари якунлангач, 24 октябрь куни Ўзбекистонда Президент сайловлари ўтказилади" сарлавҳали мақола чоп этилди. Бу ҳақда "Дунё" АА хабар бермоқда.
Қайд этилишича, газета мухбири Али ал-Ҳасаний томонидан тайёрланган материалда жорий йилнинг 24 октябрь куни Ўзбекистонда ўтказиладиган Президент сайлови кампаниясининг бориши, мамлакатда ва хориждаги ваколатхоналар ҳузурида ташкил этилган сайлов участкаларида овоз бериш учун яратилаётган шароитлар ва номзодлар ҳақида батафсил ахборот берилган.
Ўзбекистон Марказий сайлов комиссияси томонидан Президент сайлови кампанияси борасида мунтазам маълумотлар бериб борилмоқда.
Мақолада давлат раҳбарлигига Ўзбекистон "Миллий тикланиш" демократик партиясидан партия раиси Aлишер Қодиров, "Aдолат" социал-демократик партияси сиёсий Кенгаши раиси Баҳром Aбдуҳалимов, Ўзбекистон Халқ демократик партиясидан Мақсуда Ворисова, Ўзбекистон Либерал-демократик партиясидан Шавкат Мирзиёев ва Ўзбекистон Экологик партияси Марказий Кенгаши Ижроия қўмитаси раиси Нарзулло Обламуродов номзодлари илгари сурилгани қайд этилган.
"Президент сайловида қатнашиш ва унинг ўтказилишини кузатиб бориш учун минтақавий ва халқаро ташкилотлар билан мувофиқлаштириш амалга оширилди, ҳозиргача Ўзбекистонда бу йилги сайловларни ёритиш учун 930 дан ортиқ маҳаллий ва хорижий ОAВ вакиллари рўйхатга олинган", — деб ёзади "Asdaa Oman" газетаси.
Нашр ўз ўқувчиларини Ўзбекистон сайлов қонунчилигига киритилган ўзгаришлар билан ҳам таништирган.
"Ўзбекистон Сенати Президент сайловини ўтказиш санаси бўйича қонунга ўзгартириш киритишни маъқуллади ва унга мувофиқ, декабрь ойидан октябрь ойига кўчирилди", — деб таъкидлайди муаллиф.
Аввалроқ сайлов бюллетенининг шакли ва матни тасдиқлангани, Президент сайлови жараёнларига Ички ишлар вазирлиги ва Миллий гвардия ходимлари жалб этилгани, сайлов бюллетенларини Брайль алифбосида тайёрлаш таклиф қилингани, МСК раиси ўринбосари Баҳром Қўчқоров президент сайловларида қатнашадиган номзодларга нисбатан қонунчиликда белгиланган талабларда ўзгариш йўқлиги хабар қилинганди. Бундан ташқари, Ўзбекистонда коронавирусдан даволанаётганлар президент сайловида қандай иштирок этиши ҳамда Қорақалпоғистон Республикаси, вилоятлар ва Тошкент шаҳри ҳудудларида Ўзбекистон Республикаси Президенти сайловини ўтказиш учун 14 та сайлов округи тузиш тўғрисида қарор қабул қилингани ҳақида хабар берилганди.
