Тожикистон пойтахти Душанбе шаҳрида электросамокат, электроскутер ва шунга ўхшаш шахсий транспорт воситаларидан фойдаланиш 2030 йилгача вақтинча чеклаб қўйилди. Қарор шаҳар Халқ депутатлари кенгаши томонидан қабул қилинган.
Расмий маълумотга кўра, ушбу чоралар шаҳар йўл ҳаракати хавфсизлигини ошириш, тартибсиз ҳаракатларни камайтириш ва пиёдалар учун хавфсиз муҳит яратиш мақсадида жорий этилган. Сўнгги йилларда электросамокатлар иштирокидаги йўл-транспорт ҳодисалари сони орткани, бу эса ҳайдовчилар ҳамда пиёдаларга хавф туғдиргани таъкидланмоқда.
Янги тартибга кўра, электросамокат ва скутерлардан фақат махсус ажратилган ҳудудларда фойдаланиш мумкин бўлади. Чекловлар зарур хавфсизлик инфратузилмаси шакллантирилгунга қадар амал қилади.
Шаҳар маъмурияти ота-оналарга мурожаат қилиб, вояга етмаган болаларнинг бу воситалардан фойдаланишига йўл қўймасликни, тақиқланган жойларда ҳаракатланмасликни қатъий тавсия этмоқда.