Иллинойс ва Чикаго штатлари Трампни судга берди
Суд Трампнинг гвардия жойлаштириш сиёсатини сиёсий мақсадли ва конституцияга зид деб кўриб чиқмоқда.
Иллинойс штати ҳукумати ва Чикаго шаҳри АҚШ президенти Дональд Трамп маъмуриятига қарши федерал судга даъво аризаси киритди. Улар Трамп томонидан штатга Миллий гвардиянинг 300 нафар аъзосини юбориш қарори ноқонуний деб ҳисобламоқда.
Даъвода қайд этилишича, федерал қўшинларни Иллинойсга киритиш “конституцияга зид, хавфли ва сиёсий сабабларга асосланган” деб баҳоланган. Шунингдек, Трампнинг илгари Иллинойс ва Чикаго раҳбариятига нисбатан “таҳдид ва ҳақоратомуз” баёнотлар бергани ҳам тилга олинган.
Даъвогарлар суддан Миллий гвардия аъзоларини “ноқонуний федераллаштиришни” тўхтатишни сўраган. Аризада айбланувчилар сифатида Трамп, ички хавфсизлик вазири Кристи Ноем ва мудофаа вазири Пит Хегсет кўрсатилган.
Оқ уй 5 октябрь куни президентнинг Миллий гвардия кучларини “маҳаллий ҳокимият назорат қила олмаётган тартибсизликларни тўхтатиш” мақсадида Иллинойсга юбориш тўғрисидаги қарорини эълон қилган эди.
Иллинойс губернатори Жей Притскер бу қарорни “Америка қадриятларига зид” деб атади ва Оқ уйни штат аҳолиси устидан “тажовузкорлик билан назорат ўрнатишга уринишда” айблади.
Аввалроқ, суд Трампнинг Портленд шаҳрига федерал кучларни жойлаштириш ҳақидаги қарорини ҳам вақтинча блоклаган эди. Судья президентнинг бу қарорини “конституциявий ваколатларни ошириб юбориш” деб баҳолаган.
