Пойтахтнинг Шайхонтоҳур туманида жойлашган “Чорсу” бозори яқинидаги автотураргоҳда содир бўлган ўғирлик жинояти юзасидан тезкор чора кўрилди. Ички ишлар органларига соат 09:30 да автомашина ичида катта миқдордаги пул йўқолгани ҳақида хабар келиб тушган.
Тезкор-тергов гуруҳи воқеа жойига етиб бориб, кузатув камераларини ўрганиш орқали жиноятчининг шахсини аниқлади. У аввал судланган, Тошкент шаҳрида яшовчи Ойбек исмли фуқаро экани маълум бўлди.
Текширув давомида гумонланувчи ўз қилмишини тан олди. У оқ рангли “Nexia-2” автомобили эшигини бузиб, салондан пулларни олиб кетганини айтган. Олинган маблағнинг бир қисмини алимент қарзини тўлашга, қолганини эса шахсий маиший эҳтиёжларига сарфлаганини билдирган.
Суриштирувда аниқланишича, ушбу шахс илгари ҳам Ўзбекистон Республикаси Жиноят кодексининг 169-моддаси (ўғирлик) ва 276-моддаси (гиёҳванд моддаларни қонунига хилоф равишда сақлаш) бўйича судланган.
Ҳозирда унга нисбатан яна Жиноят кодексининг 169-моддаси билан жиноят иши қўзғатилди ва у қамоққа олинди.