Тошкент шаҳрининг турли туманларида ҳужжатлари тўлиқ расмийлаштирилмаган 59 та объект қурилиши бутунлай тўхтатилди. Бу ҳақда Тошкент шаҳар ҳокимлиги ахборот хизмати хабар берди. Аниқланишича, мазкур объектларнинг ҳеч бири қурилиш учун зарур бўлган рухсатномаларга эга бўлмаган.
Ноқонуний қурилишлар қуйидаги туманларда аниқланган: Янгиҳаёт туманида 17 та, Мирободда 8 та, Мирзо Улуғбекда 7 та, Олмазор ва Чилонзор туманларида ҳар бирида 5 тадан, Юнусободда 4 та, Яшнобод, Сергели ва Бектемирда 3 тадан, Учтепа ва Яккасаройда эса 2 тадан объект мавжуд. Барча қурилишлар электр тармоқларидан узиб қўйилган ва майдонларда мониторинг ишлари давом эттирилмоқда.
Расмийлар ҳар бир қонунбузарлик бўйича ҳуқуқий чоралар кўрилишини маълум қилди. Шу билан бирга, фуқароларга мол-мулк харид қилишда барча ҳужжатларнинг асл нусхаларини (кадастр, экспертиза хулосаси, кенгаш қарори, техник кўрик далолатномаси) талаб қилиш, ҳужжатларни синчиклаб ўрганиш ва пулни норасмий йўл билан бермаслик тавсия қилинди.
Аввалроқ бир нечта фуқаролар ҳужжатсиз уйларга пул тўлаб, алданганини билдирган эди. Шунинг учун пойтахт ҳокимлиги ноқонуний қурилишларга қарши курашни кучайтирган ва бу каби ҳолатларнинг олдини олиш учун жамоатчиликдан ҳушёрликни оширишни сўрамоқда.