АҚШ президенти Доналд Трамп Россиянинг сўнгги ҳаракатлари фонида янги санкциялар жорий этиш масаласини жиддий кўриб чиқаётганини маълум қилди. Бу ҳақда у журналистлар билан мулоқот чоғида айтиб ўтди.
“Путин бизга доимий равишда босим ўтказишга уринмоқда. Унинг баёнотлари чиройли эшитилади, аммо амалий жиҳатдан фойдасиз”, — деди Трамп. У, шунингдек, Путин ҳаракатларидан норози эканини билдирди, аммо бунга қандай жавоб қайтарилиши борасида тафсилот бермади: “Бу борада сизга ҳеч нарса айтмайман. Биз кичик бир совға қилишни истамаймиз”.
Трамп, шунингдек, Украина можаросини ҳал қилиш кутилганидан мураккаброқ бўлиб чиққанини таъкидлади: “Бу уруш 3–4 кун ичида якунланиши мумкин эди. Аммо украиналиклар жуда кучли қуролларга эга. Биз уларга энг замонавий қуролларни етказиб бердик”.
АҚШ президенти Украина учун мудофаа қуролларини етказиб беришни шахсан қўллаб-қувватлаганини ҳам қайд этди. “Путин одамларнинг ҳаётига нисбатан бефарқ. Жуда кўп инсонларни ўлдиряпти. Шунинг учун биз Украина учун айрим мудофаа қуролларини юборяпмиз, мен бунга рухсат бердим”, — деди Трамп.
Шу билан бирга, Украина учун қурол етказиб бериш бўйича сўнгги ҳафтадаги узилишлар ҳақида саволга Трамп жавоб бермади: “Билмадим. Нега бу ҳақида мендан сўраяпсиз? Менимча, бу савол Пентагон вакилларига тегишли”.