Нобел қўмитаси Венесуэла мухолифати етакчиси Мария Корина Мачадо ўзига берилган Тинчлик бўйича Нобел мукофотини АҚШ президенти Дональд Трампга топшириш нияти ҳақида баёнотлар ортидан расмий огоҳлантириш билан чиқди. Қўмита мукофот фақат лауреатнинг ўзига тегишли бўлиб қолишини ва ҳеч қандай ҳолатда бошқа шахсга ўтказилмаслигини таъкидлади. Бу ҳақда People нашри хабар бермоқда.
Қўмита 9 январь куни эълон қилган баёнотида Нобел мукофоти берилгач, унинг мақоми ўзгармаслигини билдирди. “Мукофот на бекор қилинади, на бўлинади ва на бошқа бировга топширилади. Қарор якуний ва абадий ҳисобланади”, дейилади расмий изоҳда. Шунингдек, Нобел қўмитаси бу борада тез-тез келиб тушадиган саволларга аниқлик киритишга мажбур бўлаётганини ҳам қайд этди.
Аввалроқ Мария Корина Мачадо АҚШ оммавий ахборот воситаларига берган интервьюларида Нобел мукофотини Доналд Трампга “ҳадя қилиш” истагини билдирган эди. Трамп эса ушбу таклифга аниқ жавоб бермаган бўлсада, буни “катта шараф” деб атаган. Нобел қўмитаси эса Трампнинг розилиги ёки рад жавоби бу масалада мутлақо аҳамиятга эга эмаслигини таъкидлади.
Мачадо Нобел тинчлик мукофотига Венесуэлада демократик ҳуқуқлар учун олиб борган кураши ва тинч сиёсий ўтиш жараёнига қўшган ҳиссаси учун сазовор бўлган. Шу билан бирга, Ғарб ОАВлари унинг мукофотни қабул қилиши ва Трампга бағишлаши Венесуэладаги сиёсий келажагига салбий таъсир кўрсатганини ёзмоқда. Нобел қўмитаси эса бундай сиёсий баҳслардан қатъи назар, мукофот мақоми ўзгармаслигини яна бир бор тасдиқлади.