Депутат ва “Миллий тикланиш” демократик партияси етакчиси Алишер Қодиров Россияда ўтказилган антимигрант рейдлар ортидан Ўзбекистон фуқаросининг ҳалок бўлгани ҳақидаги хабарлар сабаб кескин баёнот билан чиқди. У Россиядаги меҳнат мигрантлари учун шароит тобора ёмонлашиб бораётганини таъкидлади.
Қодировнинг айтишича, Россия куч ишлатувчи тузилмалари Марказий Осиёдан келган мигрантларни энди иқтисодий ресурс сифатида эмас, балки хавф ва таҳдид сифатида қабул қилмоқда. Шу сабабли у ўзбекистонликларни мавжуд хатарларни ҳушёр баҳолашга ва ҳаётини хавф остига қўймасликка чақирди.
“Имкон қадар тезроқ Россияни тарк этинг. Ҳеч қандай даромад ота-онангиз ва фарзандларингизнинг кўз ёшларига арзимайди. Ишонинг, вазият ой сайин фақат ёмонлашади”, — деди Алишер Қодиров. Унинг фикрича, яқин келажакда Россияда мигрантларга нисбатан босим янада кучайиши мумкин.
Эслатиб ўтамиз, аввалроқ Россияда ўзбекистонлик мигрант ОМОН ходимлари томонидан калтаклангани хабар қилинган эди. Ҳодиса оқибатида икки нафар фуқаро бош қисмидан оғир тан жароҳати олган. Жабрланганлардан бири бир неча кундан сўнг вафот этган, яна бири оғир аҳволда шифохонага ётқизилганди. Ушбу воқеалардан сўнг Ўзбекистон ТИВ Россия томонига расмий нота юборган.