AUKUS қуролланиш пойгасини кучайтиради – Хитой мудофаа вазирлиги
Хитой мудофаа вазирлиги АҚШ, Буюк Британия ва Австралия ўртасидаги янги альянс – AUKUS га нисбатан муносабат билдирди. Бу ҳақда “Риа Новости” хабар берди.
Мудофаа вазирлиги расмий вакили У Цяньнинг сўзларига кўра, ушбу давлатларнинг атом сувости кемалари соҳасидаги ҳамкорлиги минтақада қуролланиш пойгасини кучайтиради. Бунинг оқибатида бутун дунёдаги тинчликка хавф солинади.
“АҚШ, Буюк Британия ва Австралиянинг сувости кемалари соҳасида исталган турдаги ҳамкорлиги минтақада қуролланиш пойгасини кучайтиради, унинг тинчлик ва барқарорлигига таҳдид солади, шунингдек, халқаро ядро хавфсизлигидаги умумий уринишларга салбий таъсир қилади”, – деган расмий вакил.
У Хитой бунга қатъий қарши эканини таъкидлаган.
Маълумот ўрнида: 15 сентябрь куни АҚШ, Буюк Британия ва Австралия ўртасида янги альянс тузилди. Эришилган келишув доирасида АҚШ Канберрага саккизта атом сувости кемаси тақдим этади. Шу билан бирга бу сувости кемалари ядро қуроли билан жиҳозланмайди. Мутахассислар AUKUS, энг аввало, Хитой ва унинг ўсиб бораётган таъсирига қаратилганини таъкидламоқда.
Aввалроқ Хитойнинг Вашингтондаги элчихонаси “совуқ уруш” давридаги фикрлашдан воз кечишга чақиргани хабар қилинганди. Шунингдек, Франция Австралия ва АҚШдаги элчиларини чақириб олгани маълум қилинганди.
Жаҳонгир Қўзиев
