O‘zbekistonda mahkumlar ilk bor saylovda ovoz berish huquqidan foydalandi
O‘zbekistondagi tergov hibsxonalari va qamoqxonalarida saqlanayotgan mahkumlar ilk bor 24-oktabr kuni bo‘lib o‘tgan Prezident saylovida ovoz berish huquqidan foydalandi.
Bu haqda kecha O‘zbekiston ichki ishlar vaziri Po‘lat Bobojonov Markaziy saylov komissiyasida bo‘lib o‘tgan brifingda maʼlum qildi.
Saylov kodeksiga ko‘ra, yengilroq jinoyat sodir etganligi uchun ozodlikdan mahrum qilish joylarida saqlanayotgan shaxslar Prezident saylovida ishtirok etish huquqiga ega.
Jazoni ijro etish muassasalarida saylovchilarning ovoz berishi uchun 18 ta saylov uchastkasi tashkil etilgan bo‘lib, 8203 saylovchi ovoz berish huquqiga ega bo‘lgan.
Bundan avval qamoqxonalardagi mahkumlar soni bo‘yicha reyting eʼlon qilingani, Qarshi shahrida 18 nafar mahkum jazodan ozod etilgani hamda Shavkat Mirziyoyev O‘zbekiston mustaqilligining 30 yilligi arafasida 215 nafar mahkumni afv etgani haqida xabar berilgandi.
Olamgir Abdiyev
