Alkogol va tamaki mahsulotlarining aksiz markalanishiga o‘zgartirishlar kiritiladi
2022-yil 1-noyabrdan 1-dekabrgacha tajriba tariqasida tabiiy vino mahsulotlari va shampan vinolariga aksiz markalari qo‘yilmaydi.
Joriy yilning 2-noyabr kuni "Alkogol va tamaki mahsulotlarining aksiz markalanishiga o‘zgartirishlar kiritish to‘g‘risida"gi hukumat qarori qabul qilindi.
Qarorga ko‘ra, 2022-yil 1-noyabrdan 1-dekabrgacha tajriba tariqasida tabiiy vino mahsulotlari va shampan vinolariga aksiz markalari qo‘yilmaydi. Biroq raqamli belgilarga qo‘yiladigan talablar saqlanib qolmoqda.
Qayd etilishicha, sigaretlardan tashqari tamaki mahsulotlarini ishlab chiqaruvchilar va import qiluvchilar (jumladan, tutunsiz tamaki mahsulotlari, nikotinli snus, nikotin suyuqliklari va elektron sigaretalar) onlayn markalash tizimida ro‘yxatdan o‘tishlari va ushbu mahsulotlar to‘g‘risidagi maʼlumotlarni kiritishlari kerak.
Maʼlumot uchun: ro‘yxatga olish muddati 2022-yil 1-sentabrgacha yoki ushbu faoliyat boshlangan kundan boshlab 7 kun ichida bo‘ladi.
Eslatib o‘tamiz, 2022-yil 1-oktabrdan boshlab sigaretsiz tamaki mahsulotlarining o‘ramlari raqamli belgilanishi, 2023-yil 1-martdan boshlab ularning aylanmasi haqidagi barcha maʼlumotlar yorliqlash tizimiga kiritilishi kerak.
Avvalroq "Yangi O‘zbekiston" savdo belgisi bilan alkogol mahsulot ishlab chiqarilishi, alkogol mahsulotlarini noqonuniy muomalaga kiritgan shaxslar qo‘lga olingani, spirtli ichimlik ichish saratonga olib kelishi aniqlangani hamda Ohangaronda 1 milliard so‘mdan ziyod noqonuniy tovarlar ushlab qolingani haqida xabar berilgandi.
