Оҳангаронда 1 миллиард сўмдан зиёд ноқонуний товарлар ушлаб қолинди
Тошкент вилояти божхона бошқармаси контрабандага қарши курашиш ва божхона аудити бўлими ходимлари Давлат хавфсизлик хизмати ходимлари билан ҳамкорликда фуқаро Х.А. бошқарувидаги “ISUZU” русумли автотранспорт воситасини тўхтатиб, холислар иштирокида кўздан кечирди.
Натижада, ушбу автомашина юкхонасида хорижда ишлаб чиқарилган умумий қиймати 357 миллион сўмлик, жами 3980 дона чилим учун тамаки маҳсулотлари борлиги аниқланди. Бу ҳақда "Zamon".uz га Давлат божхона қўмитаси ахборот-хизмати раҳбари Нурбек Саломов хабар қилди.
Шунингдек, шу куни фуқаро У.Ж. бошқарувидаги “ISUZU” русумли автотранспорт воситаси ҳам кўздан кечирилди. Натижада, ушбу автомашина юкхонасида тегишли ҳужжатлари бўлмаган умумий қиймати 603,9 миллион сўмлик товар моддий бойликлар борлиги аниқланди.
Тезкор тадбирлар давом эттирилиб, фуқаро А.И. бошқарувидаги “ISUZU” русумли автотранспорт воситаси ҳам кўздан кечирилди. Текширув давомида ушбу автомашина юкхонасида ноқонуний киритилган 90 миллион сўмлик 36 дона телевизор борлиги аниқланди ва ашёвий далил сифатида олинди.
Ўтказилган тезкор тадбирлар давомида умумий қиймати 1 050 856 000 сўмлик товар моддий бойликларининг ноқонуний айланмасига чек қўйилди.
Ҳозирда ушбу ҳолат юзасидан суриштирув ишлари олиб борилмоқда.
Бундан аввал Тошкентда 15,3 миллиард сўмлик ноқонуний олиб кирилган парфюмерия воситалари аниқлангани ҳамда Тошкент халқаро аэропортида ноёб судралиб юрувчи жонзотларни олиб чиқишга уринган шахс тўхтатиб қолингани ҳақида хабар берилганди.
Муножат Валиева
