O‘zbekiston sayyohlik sanoatini rivojlantirish istiqbollari — Belgiya OAV eʼtiborida
O‘zbekistonning ming yillar davomida saqlanib kelayotgan qadim tarixi, shaharlari va turistik jozibadorligi eʼtirof etilgan.
Belgiya portaliga ko‘ra, keyingi yillarda turizm industriyasining ustuvor yo‘nalishlaridan biri - bu sayyohlik zonalari va dam olish maskanlarini bunyod etishdir. Xususan, Toshkent viloyatining Bo‘stonliq tumani, Jizzax viloyatining Zomin tumani, Namangan va Surxondaryo viloyatlarida sayyohlik zonalari tashkil etilmoqda. Shuningdek, Aydar-Arnasoy ko‘llari atrofida dam olish, plyaj va suv turizmi uchun zamonaviy majmuani yaratish rejalashtirilmoqda.
Belgiyaning "Travel Tomorrow" axborot portali veb-saytida "2021 va undan keyingi yillarda O‘zbekistonda turizm" sarlavhali maqola eʼlon qilindi.
“Turizm O‘zbekiston milliy iqtisodiyotining strategik sohalaridan biriga aylandi. Markaziy Osiyo mintaqasidagi ushbu mamlakatga 2016-yil 2,1 million mehmon kelgan bo‘lsa, pandemiya oldidan, yaʼni 2019-yil 6,7 million sayyoh tashrif buyurgan”, — deyiladi nashrda.
Maqolada koronavirus pandemiyasining taʼsiri oqibatida 2020-yil yurtimizga 1,5 millionga yaqin sayyoh kelgani qayd etilgan. Bundan tashqari, sayyohlik sohasidagi xizmat ko‘rsatish eksporti 260 million dollarni tashkil etdi. Bu ko‘rsatgich 2019 yilda erishilgan natijaning 20 foiziga teng bo‘lgani ham alohida taʼkidlagangan.
Maqolada O‘zbekiston Bosh vaziri o‘rinbosari, Turizm va sport vaziri Aziz Abduhakimovning pandemiya va undan keyingi davrda milliy turizm sanoatini qayta tiklash haqidagi fikrlari ham o‘rin olgan:
"COVID-19 pandemiyasi oqibatlarini yumshatish va pandemiyadan keyingi davrda sayyohlik oqimini tiklash uchun mamlakatda turizmni yana-da rivojlantirish va tiklash orqali turizm biznesini qo‘llab-quvvatlash bo‘yicha chora-tadbirlar dasturi qabul qilindi. Prezident va hukumat qarorlarida turizm sohasi uchun qator imtiyoz va preferensiyalar ko‘zda tutilgan".
Avvalroq O‘zbekistonning sayyohlik salohiyati Belgiya jamoatchiligi diqqat markazida bo‘lgani, Samarqand UNWTO Bosh Assambleyasini o‘tkazish uchun nomzod sifatida ko‘rsatilgani hamda "THE NEW YORK TIMES" gazetasining sahifalarida Samarqandning sayyohlik salohiyati yoritilishi haqida xabar berilgandi.
