Abdulaziz Komilov YXHT Tashqi ishlar vazirlari Kengashining yig‘ilishi ishtirok etdi
Unda YXHTning hamkor-mamlakati sanalgan Afg‘onistondagi vaziyatga alohida eʼtibor qaratildi.
Bugun, 2-dekabr kuni Tashqi ishlar vaziri Abdulaziz Komilov Stokgolm shahrida Yevropada xavfsizlik va hamkorlik tashkiloti Tashqi ishlar vazirlari Kengashining 28-yig‘ilishida ishtirok etdi. Bu haqda vazirlik axborot xizmati xabar berdi.
Uchrashuvda YXHT makonida harbiy-siyosiy, iqtisodiy-ekologik va insoniy o‘lchovlardagi hamkorlikning dolzarb masalalari muhokama qilindi.
Taʼkidlanishicha, o‘zaro savdoni kengaytirish, sanoat kooperatsiyasini chuqurlashtirish, agrar sektorda yangi texnologiyalarni joriy etish, tabiatni muhofaza qilish va bioxilma-xillikni saqlash masalalaridagi aloqalarni faollashtirish bo‘yicha kelishilgan saʼy-harakatlarni amalga oshirish zarur.
Shuningdek, O‘zbekiston tomoni hamkorlikni davom ettirishga hamda barcha sohalar bo‘yicha dolzarb dasturlar sonini mutanosib ravishda oshirish masalalari ham ko‘rib chiqildi.
Uchrashuv so‘ngida, O‘zbekiston Tashqi ishlar vaziri ushbu mamlakatda gumanitar falokatning oldini olish uchun afg‘on xalqiga zarur yordam ko‘rsatish yuzasidan shoshilinch choralarni ko‘rishga chorladi.
Eslatib o‘tamiz, AQSH Davlat kotibi o‘rinbosari Uendi Sherman O‘zbekiston rasmiylari bilan Afg‘onistondagi vaziyatni muhokama qilgandi.
Avvalroq Abdulaziz Komilov BMT maxsus maʼruzachisi Fionnuala Ni Aolayn bilan uchrashgani, Saudiya Arabistoni Qirolligining Favqulodda va muxtor elchisini qabul qilgani, Germaniya tashqi ishlar vaziri bilan uchrashuv o‘tkazgani hamda Tehrondagi Afg‘oniston masalasiga bag‘ishlangan uchrashuvda ishtirok etgani haqida xabar berilgandi.
