Абдулазиз Комилов Германия ташқи ишлар вазири билан учрашув ўтказди
30 август куни Ўзбекистон ташқи ишлар вазири Абдулазиз Комилов Тошкент шаҳрига ташриф билан келган Германия ташқи ишлар вазири Хайко Маас билан учрашув ўтказди, деб хабар беради вазирлик матбуот хизмати.
Маълум қилинишича, мулоқот чоғида Ўзбекистон–Германия ҳамкорлигининг долзарб масалалари муҳокама қилинган, бўлажак қўшма тадбирлар жадвали ва кун тартиби кўриб чиқилган.
Шунингдек, Афғонистондаги бугунги вазиятга алоҳида эътибор қаратилган. Хайко Маас Ўзбекистон томонига Афғонистондан Германия ва бошқа хорижий давлатлар фуқароларининг эвакуациясини ташкиллаштиришда кўрсатган ёрдами учун яна бир бор миннатдорлик билдирган. Томонлар Афғонистон йўналишида яқин ҳамкорликни давом эттиришга тайёрлигини маълум қилди.
«Учрашувда икки мамлакатнинг халқаро ва минтақавий ташкилотлар доирасидаги ҳамкорлиги юзасидан ҳам фикр алмашилди», — дейилади хабарда.
Аввалроқ Ўзбекистон ташқи ишлар вазири Абдулазиз Комилов Швейцариянинг фавқулодда ва мухтор элчиси этиб тайинланган Константин Оболенскийни қабул қилгани тўғрисида хабар бергандик.
