АҚШ Давлат котиби ўринбосари Ўзбекистон расмийлари билан Афғонистондаги вазиятни муҳокама қилди
Мамлакатимизга ташриф буюрган Америка Қўшма Штатлари Давлат котиби биринчи ўринбосари Уэнди Шерман 3 октябрь куни Tашқи ишлар вазири Абдулазиз Комилов билан учрашди.
Ўзаро мулоқотда асосан минтақа ва Афғонистондаги вазият муҳокама қилинган. Томонлар Афғонистонда миллий ярашув ва инклюзив ҳукуматни шакллантириш жараёнига кўмаклашиш, мамлакатда инсон ҳуқуқ ва эркинликларини таъминлаш, гуманитар инқирознинг олдини олиш зарурлигини таъкидлаган.
Шунингдек, савдо-иқтисодий ва сармоявий ҳамкорликни ривожлантириш масалаларига эътибор қаратилган. Бўлажак қўшма тадбирлар жадвали ва ташкилий жиҳатлари, хусусан, стратегик ҳамкорлик мулоқотининг биринчи йиғилишини ўтказиш масалалари муҳокама қилинган.
Музокараларда Ўзбекистон Республикаси Президенти ҳузуридаги Хавфсизлик кенгаши котиби Виктор Маҳмудов ва Адлия вазири Русланбек Давлетов иштирок этди.
Аввалроқ Абдулазиз Комилов делегацияси ТТДҲК ташқи ишлар вазирлари кенгаши йиғилишида иштирок этиши ҳақида хабар берилганди.
Чўлпоной Аҳмедова
