Termizda Afg‘oniston iqtisodiyotiga mutaxassislar tayyorlash uchun taʼlim klasteri tashkil etiladi
"Xalqaro hamjamiyatning ustuvor vazifasi Afg‘onistondagi insoniy halokatning oldini olishdan iborat bo‘lishi kerak" — V. Norov.
1-dekabr kuni Polshada o‘tkazilgan Yevropada xavfsizlik va hamkorlik tashkiloti (YEXHT) Tashqi ishlar vazirlari kengashining 29-yig‘ilishida O‘zbekiston Respublikasi TIV rahbari Vladimir Norov Afg‘oniston masalasiga ham to‘xtalib o‘tdi.
“Xalqaro hamjamiyatning ustuvor vazifalari Afg‘onistondagi insoniy halokatining oldini olish, mamlakat iqtisodiyotini tiklash va mintaqaviy savdo-iqtisodiy aloqalarga integratsiya qilish, bu mamlakatda muhim infratuzilma va ijtimoiy loyihalarni amalga oshirishdan iborat bo‘lishi kerak, – dedi V. Norov.
O‘zbekiston TIV rahbari yig‘ilish ishtirokchilari eʼtiborini O‘zbekiston tomonidan Afg‘onistonni ijtimoiy-iqtisodiy tiklash va gumanitar yordam ko‘rsatish borasida amalga oshirilayotgan saʼy-harakatlarga qaratdi. Strategik muhim loyiha “Termiz – Mozori Sharif – Kobul – Peshovar” temir yo‘l loyihasini amalga oshirilishi Markaziy va Janubiy Osiyo o‘rtasidagi o‘zaro bog‘liqlikni mustahkamlash, Afg‘onistonni iqtisodiy hamkorlikka jalb etish va uni bu ikki mintaqani bog‘laydigan ko‘prikka aylantirish uchun katta imkoniyatlar ochadi.
Vazir YEXHT hamkorlarini uzoq qiyin vaziyatdagi afg‘on xalqiga gumanitar yordam ko‘rsatish uchun Termiz shahridagi Xalqaro transport va logistika xabidan foydalanishga, shuningdek, Afg‘oniston iqtisodiyoti uchun mutaxassislar tayyorlash uchun Termiz shahrida taʼlim klasterini tashkil etishni qo‘llab-quvvatlashga taklif qildi.
