Ikkita tashkilot sudda davlat bojini to‘lashdan ozod etiladi
Senat majlisida "Davlat boji to‘g‘risida”gi qonun ko‘rib chiqildi.
Senat qirq ikkinchi yalpi majlisida "Davlat boji to‘g‘risida”gi qonunga o‘zgartish va qo‘shimchalar kiritish haqida»gi qonun ko‘rib chiqildi.
Qonun bilan Raqobatni rivojlantirish va isteʼmolchilar huquqlarini himoya qilish qo‘mitasini hamda Iqtisodiyot va moliya vazirligi huzuridagi Tadbirkorlik faoliyatini qo‘llab-quvvatlash davlat jamg‘armasini sudlarga murojaat qilish chog‘ida davlat bojini to‘lashdan ozod etish nazarda tutilmoqda.
Amaldagi "Davlat boji to‘g‘risida"gi qonunning 8-, 9- va 10-moddalarida Raqobatni rivojlantirish va isteʼmolchilar huquqlarini himoya qilish qo‘mitasi hamda uning hududiy organlari – o‘z zimmasiga yuklatilgan vakolatlariga muvofiq sudlar ko‘rib chiqishi uchun kiritiladigan daʼvolar yuzasidan davlat bojini to‘lashdan ozod qilingan.
Kiritilayotgan o‘zgartish va qo‘shimchalarga ko‘ra, Tadbirkorlik faoliyatini qo‘llab-quvvatlash davlat jamg‘armasi hamda Raqobatni rivojlantirish va isteʼmolchilar huquqlarini himoya qilish qo‘mitasi va uning hududiy organlari tomonidan fuqarolik ishlari bo‘yicha sudlar, iqtisodiy sudlar va maʼmuriy sudlarga daʼvo ariza, ariza va shikoyatlar bilan murojaat qilinganda davlat bojidan ozod qilinishi nazarda tutilmoqda.
Qonun senatorlar tomonidan maʼqullandi.
