Shavkat Mirziyoyev Butunxitoy qo‘mitasi Raisi bilan uchrashdi
Uchrashuvda ikki davlat o‘rtasidagi munosabatlarni yana-da kengaytirish va mustahkamlash istiqbollari muhokama qilindi.
Xitoyga tashrif tadbirlari doirasida Prezident Shavkat Mirziyoyev Xalq siyosiy maslahat kengashi Butunxitoy qo‘mitasi Raisi Van Xunin bilan uchrashuv o‘tkazdi.
Suhbatda Xitoy tomoni davlat rahbari “Makon va yo‘l” uchinchi xalqaro forumida ilgari surgan muhim tashabbuslarni yuksak baholadi va buning uchun samimiy minnatdorlik bildirdi.
O‘zbekiston-Xitoy do‘stlik va har tomonlama strategik sheriklik munosabatlarini yana-da kengaytirish va mustahkamlash istiqbollari muhokama qilindi.
Konstruktiv siyosiy muloqotning bugungi darajasi va xalqaro tashkilotlar doirasidagi o‘zaro ko‘mak alohida mamnuniyat bilan qayd etildi.
Samarqand va Sian shaharlarida o‘tgan sammitlar davomida erishilgan kelishuvlar izchil amalga oshirilmoqda.
Savdo-iqtisodiy va investitsiyaviy hamkorlik ijobiy surʼat bilan rivojlanib bormoqda. Hududlar o‘rtasidagi aloqalar faollashdi. Oxirgi oylarda O‘zbekistonga Shinjon-Uyg‘ur avtonom hududi, Shandun, Shensi, Szyansu va Szyansi muzofotlari delegatsiyalari tashrif buyurdi.
Madaniy-gumanitar aloqalar va taʼlimdagi almashinuvni faollashtirish masalalariga alohida eʼtibor qaratildi.
